တိုင်းရင်းသားတွေ ဗိုလ်ချုပ်အောင်ဆန်း ကတိပေးခဲ့တဲ့အတိုင်း ဒီနေ့ ပြည်ထောင်စုနေ့မှာ ဆန္ဒထုတ်ဖော်ကြတယ်။ ကယားပြည်နယ် လွိုင်ကော်မြို့မှာ ဗိုလ်ချုပ်အောင်ဆန်း မြင်းစီးရုပ်တု စိုက်ထူခြင်းကို ဆန့်ကျင်တဲ့အနေနဲ့ ရန်ကုန်မြို့မှာ တက်ကြွလှုပ်ရှားသူ လူငယ် ၄၀ ကျော်က ဒီနေ့ ညနေ ၃ နာရီကျော်တွင် ဆန္ဒထုတ်ဖော်ကြတယ်။
ပြည်ထောင်စုနေ့ကို ကြိုဆိုတဲ့အနေနဲ့ ဖွဲ့စည်းပုံအခြေခံဥပဒေပြင်ဖို့ ထောက်ခံဆန္ဒပြသူတွေ ဗိုလ်ချုပ်အောင်ဆန်းရဲ့ ရုပ်တုတည်ဆောက်ပေးရေးထက် ဗိုလ်ချုပ်ပေးခဲ့တဲ့ ကတိအတိုင်း တန်းတူအခွင့်အရေးပေးပြီး ပြည်ထောင်စု မပြိုကွဲရေးအတွက် လှုပ်ရှားဆောင်ရွက်သူတွေ ပြည်သူတွေကို သေတွင်းထဲ အရောက်ပို့ပေးမဲ့ “မြစ်ဆုံစီမံကိန်း” ကို ဆန့်ကျင်ဆန္ဒပြသူတွေ တရားမျှတမှုကို တောင်းဆိုသူတွေကို မြန်မာနိုင်ငံအနှံ့မှာ တွေ့မြင်ရတယ်။
၁၉၉၀ ရွေးကောက်ပွဲ မတိုင်မီ ရွေးကောက်ပွဲပြီးတာနဲ့ အာဏာလွှဲပေးမယ် စစ်ခေါင်းဆောင်တွေအားလုံး စစ်တန်းလျားပြန်မယ်လို့ ဗိုလ်ချုပ်ကြီးစောမောင် ကတိပေးခဲ့တယ်။ ဒါပေမဲ့ ရွေးကောက်ပွဲမှာ သောင်ပြိုကမ်းပြို နိုင်သွားတဲ့ NLD ကို အာဏာ မလွဲချင်တော့ ခြေ/ဥရေးဆွဲရေးဆိုပြီး ကမ္ဘာ့သက်တမ်းအရှည်ဆုံး ညီလာခံဖြစ်တဲ့ ညောင်နှစ်ပင်ညီလာခံ ကျင်းပခဲ့တယ်။
နိုင်ငံတော်ပိုင် မီဒီယာတွေ သတင်းစာတွေက ပြည်သူရွေးထားတဲ့ပါတီကြီးနဲ့ ဒေါ်အောင်ဆန်းစုကြည်အား နည်းမျိုးစုံနဲ့ အပုတ်ချခဲ့တယ်။ ဟိုတုန်းက NLD ပါတီဝင်တွေ ပုတ်သင်ညိုညီလာခံကြီးကို သပိတ်မှောက် ထွက်ခဲ့တယ်။ ဘာပဲဖြစ်ဖြစ် ၂၀၁၅ ရွေးကောက်ပွဲမှာ NLD ရဲ့ “ပြောင်းလဲချိန်တန်ပြီ” ဆောင်ပုဒ်ကို ပြည်သူတွေ အားကိုးတကြီး ယုံပြီး မဲပေးခဲ့ကြတယ်။ ပြောင်းလဲတာတော့ မှန်တယ်။ ဒါပေမဲ့ အကောင်းဘက် မပြောင်းဘဲ စစ်အစိုးရလမ်းစဉ်အတိုင်းပဲ အဆိုးဘက်ကိုသာ ပြောင်းနေတာတွေ့ရတယ်။ ဖွဲ့စည်းပုံအခြေခံဥပဒေ ပြင်မယ်လို့ ကတိပေးပြီး တက်လာတဲ့ အစိုးရလက်ထက်မှာပဲ ဥပဒေပညာရှင်ကြီး ရက်ရက်စက်စက် လုပ်ကြံခံခဲ့ရတယ်။
မြန်မာနိုင်ငံရဲ့ ဂုဏ်သိက္ခာလဲ မဆယ်နိုင်လောက်အောင် ကျဆင်းခဲ့တယ်။ ပြည်သူအများစုက သူတို့အတွက် အလိုအပ်ဆုံးအရာမှာ “ခြေ/ဥပြင်ရေးနဲ့ တန်းတူအခွင့်အရေးရရှိရေး” သာဖြစ်တယ်လို့ သိနားလည်ကြတယ်။ ပြည်သူတွေ ဆန္ဒပြတောင်းဆိုတဲ့အတိုင်း မလုပ်ပေးနိုင်ပါက ဆန္ဒပြတောင်းဆိုသူတွေကို မတရားပစ်သတ်ပြိုကွဲမယ့်အစား မလုပ်ပေးနိုင်တဲ့အကြောင်းရင်းနဲ့ ပတ်သက်ပြီး ပြည်သူကို ချပြသင့်တယ်။
ပြည်သူအများစုက ပြည်သူ့အခွင့်အရေးအတွက် အခုလို လှုပ်ရှားနေချိန်မှာ ရခိုင်ပြည်နယ်ရဲ့ ရသေ့တောင် ကျောက်တော် ပလက်ဝ စတဲ့ မြို့နယ်တွေမှာ AA( ရက္ခိုင့်တပ်မတော်) က စစ်တပ်ကို ခြုံခိုတိုက်နေကြတယ်။ ရက္ခိတလမ်းစဉ်ခေါ် “အဖရခိုင်နိုင်ငံတော်ထူထောင်ရေး အိပ်မက်” နဲ့ ရခိုင်ပြည်နယ်မှာ ဒုက္ခသည် တိုးပွားလာအောင် ဆော်နေကြတယ်။